Нобеловата награда за физиологија и медицина доделена на Карл Дајсерот, Петер Хегеман и Георг Нагел

Нобеловата награда за физиологија и медицина за 2026 година денес им беше доделена на американскиот научник Карл Дајсерот и на германските научници Петер Хегеман и Георг Нагел за „нивните откритија поврзани со светлосно активираните јонски канали и оптогенетиката, јавува Анадолу.

Нобеловото собрание при Институтот Каролинска соопшти дека тројцата научници се наградени за откритијата што ги поставија темелите на оптогенетиката – метод што овозможува контрола на нервната активност со помош на светлина.

Хегеман и Нагел го открија каналородопсинот, протеин со уникатни својства што ги прави клетките чувствителни на светлина.

Тие утврдија дека кога овој протеин се внесува во различни видови клетки, тие стануваат чувствителни на светлина, со што се отвораат нови можности за контрола на клеточната активност преку светлина.

Подоцна Дајсерот го внесе генот за каналородопсин во нервни клетки од стаорци.

Изложувајќи ги клетките на сина светлина, тој успеа да поттикне нервни сигнали.

Потоа тој ја разви техниката за контрола на нервните клетки во мозокот на живи глувци со помош на светлина.

„Овој метод за контрола на нервните сигнали со светлина денес се нарекува оптогенетика и брзо стекна глобално влијание“, се наведува во соопштението.