„Нова“, првиот електричен ферибот во светот, се вклучи во јавниот превоз во Шведска

СТОКХОЛМ (АА) - „Нова“, првиот електричен ферибот во светот со хидрофоил технологија, започна со крстарење во водите на центарот на Стокхолм, Шведска, и со својата услуга за јавен превоз на жителите, јавува Анадолу.

„Нова“ е новиот модел П-12 развиен од шведскиот производител „Кандела“ со помош на компјутерски контролирани хидрофоилни крила со цел да може да го подигне својот труп и да „лебди“ еден метар над нивото на водата.

Со ваквиот систем фериботот ја намалува потрошувачката на енергија за 80 отсто во споредба со традиционалните пловила преку намалување на триењето на водата.

Според компанијата, технологијата на хидрофоил го прави најбрзиот електричен ферибот во светот и најбрзиот во флотата на јавниот транспорт во Стокхолм.

Фериботот е долг 12 метри, тежи 11 тони, а брзината на крстарење му е 45 км/ч. Има 25 места за седење и простор за велосипеди и колички.