Ahmet Gençtürk
03 Октомври 2023•Ажурирај: 04 Октомври 2023
АТИНА (АА) – Пјер Агостини, Ференц Краус и Ен Л’Хуилје се добитници на овогодинешната Нобелова награда за физика за експериментални методи кои генерираат атосекундни пулсирања на светлина за проучување на динамиката на електроните во материјата, пренесува Анадолу.
„Лауреатите на Нобеловата награда за физика за 2023 година се одликуваат за нивните експерименти, кои му дадоа на човештвото нови алатки за истражување на светот на електроните во атомите и молекулите“, се вели во соопштението на Кралската шведска академија на науките.
Во соопштението се наведува дека лауреатите со своите експерименти демонстрирале начин на создавање екстремно кратки импулси на светлина кои можат да се користат за мерење на брзи процеси во кои електроните се движат или менуваат енергија.
„Сега можеме да ја отвориме вратата кон светот на електроните. Атосекундната физика ни дава можност да ги разбереме механизмите управувани од електроните. Следниот чекор ќе биде нивно користење“, рече Ева Олсон, претседател на Нобеловиот комитет за физика.
