Ердоган: „Верувам дека нашите односи со САД ќе процветаат во вториот мандат на Трамп“

Турскиот претседател Реџеп Таип Ердоган денес ја истакна важноста од зајакнување на односите меѓу Соединетите Американски Држави (САД) и Туркије за време на неговиот говор на Форумот за дипломатија во Анталија, јавува Анадолу.

Ердоган изрази оптимизам за иднината на билатералните односи, особено за време на вториот мандат на претседателот Доналд Трамп.

„Верувам дека нашите односи со САД ќе процветаат на секое поле за време на вториот мандат на претседателот Трамп, исто така со придонесот на нашето блиско пријателство со него“, рече Ердоган, нагласувајќи го значењето на САД како стратешки партнер.

Во врска со растечките предизвици на глобалната трговија, Ердоган говореше за напорите за надминување на тензиите што произлегуваат од трговската конкуренција и царинските тарифи.

„Правиме сè што можеме за да спречиме жестоката трговска конкуренција преку царинските тарифи да стане деструктивна. Туркије ќе биде еден од победниците на овој процес“, рече тој.

Турскиот претседател, исто така, ја истакна амбициозната трговска цел меѓу двете земји, нагласувајќи: „Ние придаваме големо значење на нашата цел за трговска размена од 100 милијарди долари со нашиот сојузник и стратешки партнер, САД“.