Бројот на повредени во бомбашкиот напад во близина на Дамаск се искачи на 14

Бројот на повредени во експлозијата што вчера одекна во патнички минибус во сирискиот град Џарамана, во близина на Дамаск, се искачи на 14, а две лица загинаа, соопшти денес сириското Министерство за внатрешни работи, јавува Анадолу.

Според Министерството, тројца од повредените се во критична состојба.

Во објавата на Телеграм се наведува дека надлежните служби продолжуваат со истрагата за да ги утврдат околностите на, како што е наведено, „криминалниот бомбашки напад“.

Министерството ги повика граѓаните „да не подлегнуваат на обидите за сеење раздор или нарушување на граѓанскиот мир“.

Засега ниедна група не презеде одговорност за нападот.