Во божиќната порака папата потсети на тешките зимски услови со кои се соочуваат жителите на Газа

ИСТАНБУЛ (AA) – Папата Лав XIV во своето прво божиќно обраќање, одржано денес во базиликата „Свети Петар“ во Ватикан, се осврна на тешката состојба на жителите на Газа што се соочуваат со сурови зимски услови, како и на бегалците и раселените лица низ светот, јавува Анадолу.

Папата рече дека приказната за раѓањето на Исус во штала покажува дека Бог „го поставил својот кревок шатор“ меѓу луѓето во светот.

„Како можеме тогаш да не помислиме на шаторите во Газа, со недели изложени на дожд, ветер и студ?“, праша тој.

Папата посочи дека слични страдања доживуваат и други бегалци и раселени лица на сите континенти, како и бездомниците што живеат во „импровизирани засолништа“.

„Кревко е телото на незаштитените народи, погодени од многубројни војни – тековни или завршени – кои зад себе оставаат урнатини и отворени рани“, рече поглаварот на Римокатоличката црква.

Папата се осврна и на младите луѓе што се принудени да земат оружје, нагласувајќи дека оние на првите линии „ја чувствуваат бесмисленоста на она што се бара од нив и лагите што ги исполнуваат помпезните говори на оние што ги испраќаат во смрт“.

„Исус сака да ја допреме човечката беда, да го допреме страдањето на другите. Тој се надева дека ќе престанеме да ги бараме тие лични или заеднички ниши што нè штитат од вителот на човечката несреќа и наместо тоа ќе влеземе во реалноста на животите на другите луѓе и ќе ја спознаеме моќта на нежноста“, рече папата.

Во текот на двегодишната војна Израел уби повеќе од 71.000 Палестинци во Газа, повеќето жени и деца, а во голема мера ја разори и енклавата. Иако во октомври беше постигнат договор за прекин на огнот, израелските прекршувања продолжија.

Според Канцеларијата за медиуми на Владата во Газа, оттогаш се убиени повеќе од 400 Палестинци, а над илјада се повредени во израелските напади.