Германија ја поздрави одлуката за двонеделен прекин на огнот меѓу САД и Иран

Германскиот канцелар Фридрих Мерц ја поздрави одлуката за двонеделен прекин на огнот меѓу Соединетите Американски Држави (САД) и Иран, изразувајќи благодарност до Пакистан за неговата улога во посредувањето, јавува Анадолу.

„Го поздравувам двонеделниот прекин на огнот договорен меѓу САД и Иран синоќа. Му благодариме на Пакистан за неговото посредување“, напиша Мерц на американската социјална мрежа Х во средата.

Тој истакна дека сега целта е да се преговара за „траен крај на војната“.

„Ние сме во блиска координација со нашите партнери за ова прашање“, додаде Мерц.

Вчера Трамп објави дека се согласил „да ги прекине бомбардирањата и нападите врз Иран во период од две недели“.

Пакистанскиот премиер Шехбаз Шариф, кој одигра клучна улога како посредник во постигнувањето на прекинот на огнот, преку објава на социјалната мрежа Х соопшти дека ги поканил иранските и американските делегации во Исламабад овој петок. Шариф истакна дека Вашингтон и Техеран, заедно со нивните сојузници, се согласиле на итен прекин на огнот во сите конфликтни зони, вклучително и Либан.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.