„Демократите украле милијарди долари од УСАИД и други институции“, тврди Трамп

АНКАРА (АА) - Американскиот претседател Доналд Трамп реагирајќи на медиумските организации за кои вели дека биле финансирани од некои федерални институции, истакна: „Се чини дека милијарди долари се украдени од УСАИД и други институции, а голем дел од нив отишол во лажни медиумски организации како ‘мито’ за изработка на вести во кои им ласкаат на демократите“, известува Анадолу.

Трамп на својот профил на социјалната платформа ‘Truth Social’ објави текст на оваа тема откако се појавија наводи дека на медиумската организација ‘Политико’ неодамна ѝ биле исплатени приближно 8 милиони долари од различни федерални агенции.

Критикувајќи ги медиумите кои наводно добивале финансиски средства од федерални агенции, Трамп истакна:

„Според она што може да се види, милијарди долари се украдени од УСАИД и други институции, а голем дел од нив отидоа во лажни медиуми како ‘мито’ за изработка на вести во кои им ласкаат на демократите.“

Трамп ја опиша ситуацијата како „најголем скандал во историјата“ и истакна дека „Демократите не можат да избегаат од ова“.

Во САД избувна голема дебата откако американскиот милијардер и директор на Одделот за владина ефикасност (DOGE) Илон Маск излезе со тврдење дека администрацијата на демократот Џо Бајден финансирала некои медиумски организации.

Реагирајќи на уплатите, наводно направени за новинската агенција Асошиејтед прес (АП) и за весникот Њујорк тајмс, Маск го коментираше плаќањето за АП како ‘губење пари од даночните обврзници’, а фразата ‘Њујорк тајмс е весник финансиран од владата’ ја употреби за уплатите направени за овој весник.