Грција прогласи вонредна состојба на Санторини

АТИНА (АА) - Грција денес воведе вонредна состојба на островот Санторини, кој од 1 февруари е жариште за сеизмички активности во јужниот дел на Егејското Море, пренесува Анадолу.

Вонредната состојба ќе остане на сила до 3 март, соопшти грчкото Министерство за климатски кризи и цивилна заштита.

Во меѓувреме, сеизмичката активност продолжува во морското подрачје меѓу островите Санторини и Аморгос со иста фреквенција како и претходните денови, објави Грчката радиодифузна корпорација ЕРТ.

Во веста се наведува дека неколку области на Санторини се оградени поради опасност од појава на свлечишта.

ЕРТ соопшти дека тим од инженери од Атина пристигнал на островот за да ги прегледа јавните згради и училишните објекти.

Во согласност со развојот на настаните, истакнатиот грчки геолог Ефтимиос Лекас смета дека се намалува можноста за голем земјотрес со јачина од шест степени според Рихтеровата скала.

„Најверојатното сценарио, сепак, е дека сеизмичката активност ќе продолжи неколку дена или недели со ист интензитет, со исто темпо, односно со голем број земјотреси“, рече Лекас.