„Западот најверојатно веќе одлучил да ѝ дозволи на Украина да изврши ракетни напади со долг дострел во Русија“

МОСКВА (АА) - Портпаролот на Кремљ, Дмитриј Песков, денес изјави дека Западот најверојатно веќе одлучил да ѝ дозволи на Украина да изврши ракетни напади со долг дострел во Русија, тврдејќи дека останатото е само формалност, јавува Анадолу.

„Многу е веројатно дека овие одлуки се веќе донесени. Она што сега го гледаме е информативна кампања во медиумите за легитимирање на одлука која, најверојатно, веќе е донесена“, рече Песков на брифингот со новинарите во Москва.

Американските медиуми тврдат дека државниот секретар Ентони Блинкен и неговиот британски колега Дејвид Лами, кои пристигнаа во Киев денес, требало да разговараат за давање дозвола на Украина да користи ракети со долг дострел за да ја нападне руската територија.

Директорот на ЦИА, Бил Барнс, ја навести можноста САД да го преиспитаат својот став по ова прашање.

Песков предупреди дека доколку ѝ се доставуваат проектили со долг дострел на Украина за напади врз руска територија, ќе има „соодветен одговор“.

„Нема потреба да се очекуваат реакции на сите страни. Специјалната воена операција е одговор на сите овие акции“, нагласи тој.

Песков рече дека Западот со зборови се обидува да се дистанцира од конфликтот во Украина, истовремено зголемувајќи го своето учество, истакнувајќи дека одлуките за испорака на оружје за Украина само ја нагласуваат неопходноста од продолжување на „специјалната воена операција“.

„Вклучувањето на САД и европските држави во конфликтот околу Украина е директно и непосредно. Секој нов чекор само го продлабочува нивното вклучување“, додаде тој.

Песков, исто така, ги отфрли тврдењата од Вашингтон дека еден телефонски повик од американскиот претседател Џо Бајден до неговиот руски колега Владимир Путин може да стави крај на конфликтот во Украина.

Песков тврдеше дека откажувањето на Западот од неговата стратегија „да ја искористи Украина како пион против Москва“ ќе обезбеди вистинско решение.

Тој изрази надеж дека претседателските кандидати на САД ќе престанат да го користат името на претседателот Путин како алатка во домашните политички борби.

„Забележавме дека и двајцата кандидати го споменаа нашиот претседател и нашата земја... Името на Путин се користи како алатка во внатрешните политички битки на Америка. Не го цениме тоа и се надеваме дека ќе го остават името на нашиот претседател надвор од тоа“, рече тој.

Песков нагласи дека САД имаат негативен став кон Русија, без оглед на политичката припадност на нивните претседателски кандидати. „Ставот е јасен, без разлика која партија ја претставуваат кандидатите, САД одржуваат непријателски став кон нашата земја“, рече тој.

„Што се однесува до останатото, на американските гласачи им останува да ги оценат нивните кандидати. Тоа е нивна грижа, а не наша. Ние имаме свои прашања, свои достигнувања и свои предизвици“, рече Песков.

Осврнувајќи се на обвинувањата за испорака на оружје за Русија од странство, функционерот ги нарече „неосновани“, истакнувајќи дека руската војска има „целосен арсенал“.