Lina Altawell
02 Март 2026•Ажурирај: 02 Март 2026
ИСТАНБУЛ (АА) — Израелскиот министер за одбрана Израел Кац денес изјави дека генералниот секретар на Хезболах, Наим Касем, сега е „означен како цел за елиминација“, јавува Анадолу.
На американската компанија за социјални медиуми X, Кац вети дека Хезболах „ќе плати висока цена за огнот кон Израел“.
„Наим Касем, генерален секретар на Хезболах, кој се одлучи за оган под притисок од Иран, отсега натаму е означена цел за елиминација“, додаде тој.
„Кој и да го следи патот на (Али) Хаменеи, наскоро ќе се најде со него во длабочините на пеколот, заедно со сите оние елиминирани од оската на злото“, рече Кац.
Во раните утрински часови денес армијата соопшти дека започнала „офанзивна битка“ против либанската група Хезболах на територијата на Либан.
Во израелските воздушни напади погодени се јужните предградија на Бејрут, како и области во Јужен Либан, при што се убиени 31 лице, а 149 се повредени, соопшти либанското Министерство за здравство.
Хезболах рано утринава соопшти дека испукал ракети и беспилотни летала кон израелска воена база како одговор на речиси секојдневните напади од Тел Авив врз Либан и атентатот врз врховниот лидер на Иран, Али Хаменеи.
Од саботата изутрина Израел и САД извршија напади врз Иран во кои се убиени стотици луѓе, меѓу кои Хаменеи и високи официјални лица.
Техеран одговори со испукување ракети и беспилотни летала кон Израел и американските бази во неколку земји од Заливот.
Вашингтон и Тел Авив го обвинуваат Техеран дека спроведува нуклеарни и ракетни програми што им се закануваат на Израел и на сојузниците на САД во регионот. Иран вели дека неговата нуклеарна програма е мирољубива и дека не се стреми да произведува нуклеарно оружје.
