„Израел е среде тешка војна“, рече Нетанјаху по загинувањето на 8 војници во јужен Либан

КУДС (ЕРУСАЛИМ) (АА) - Во своите први изјави по смртта на осум израелски офицери и војници во борбите во јужен Либан, израелскиот премиер Бенјамин Нетанјаху рече дека Тел Авив е „среде тешка војна“, пренесува Анадолу.

„Би сакал да испратам сочувство до семејствата на нашите херои кои денеска ги загубија животите во Либан“, истакна Нетанјаху во видеообјава на X.

„Ние сме среде тешка војна против иранската оска на злото, која сака да нѐ уништи“, додаде тој.

Нетанјаху го заврши обраќањето велејќи: „Ќе ги спасиме нашите заложници на југот (Газа); ќе ги вратиме нашите жители на северот; ќе ја гарантираме вечноста на Израел“.

Претходно, израелската армија соопшти дека осум нејзини војници, од кои тројца офицери, загинале, а седум други, од кои еден офицер, биле повредени, од кои неколку потешко, во борбите во јужен Либан.

Израелскиот Канал 12 објави дека првиот судир избувнал денес во раните утрински часови во селото Одаисе, каде израелските сили биле нападнати од заседа на влезот од една куќа.

Во веста се вели дека борците на Хезболах пукале врз израелската единица од непосредна близина, како и од подалеку користејќи митралези, противтенковски проектили и минофрлачи.

Процесот на евакуација траел долго поради топографските услови и тешките временски услови во раните утрински часови, при што загинале шест војници, а петмина од единицата командоси Егоз ​​се здобиле со различни повреди.

Во вториот инцидент, единица од бригадата Голани е погодена од минофрлачки оган од борците на Хезболах и од блиски и од далечни позиции, при што загинаа двајца војници.

Израелскиот дневен весник „Једиот Ахронот“ објави дека во заседата од Хезболах во куќа во јужен Либан, каде што имало судир лице в лице, загинале шест израелски офицери и војници од единицата Егоз, а 30 биле ранети.

Израел започна масовни воздушни напади од 23 септември против, како што ги нарече, позиции на Хезболах низ Либан, во кои загинаа над 1.000 лица, а над 2.950 се повредени, според либанското Министерство за здравство.

Највисокото раководство на Хезболах беше убиено во израелските напади, меѓу кои и лидерот Хасан Насрала.