Над 3.000 мигранти сè уште живеат на улиците во шпанската Сеута, соопшти Владата

Повеќе од 3.000 мигранти, меѓу кои и неколку стотици малолетници, сè уште живеат на улиците во шпанската северноафриканска енклава Сеута, соопшти Владата денес, јавува Анадолу.

Денес министерот за територијална политика Анхел Виктор Торес ја даде процената во интервјуто за шпанскиот јавен радиодифузен сервис ТВЕ.

Торес рече дека преместувањето во сместувачки капацитети определени со владина уредба ќе продолжи во наредните денови, додавајќи дека, доколку биде потребно, ќе биде отворена уште една локација.

„Се надеваме дека сите ќе бидат преселени за само неколку недели и ќе започне обработката на постапките за враќање“, рече тој.

Според Торес, секој ден од 150 до 200 мигранти доброволно се враќаат во Мароко, при што 160 лица го направиле тоа во изминатите 24 часа.

Тој рече дека во Шпанија ќе останат само лицата што имаат право на меѓународна заштита и малолетниците што не може да бидат повторно споени со семејствата, додавајќи дека не се очекува повеќето од неодамна пристигнатите од Мароко да ги исполнуваат условите за заштита.

Владата има намера малолетниците без придружба да ги премести во континенталниот дел на Шпанија за да спречи пренатрупаност во Сеута.

Исто така, Торес го осуди нападот врз пратеник во Собранието на Сеута во неделата, кога врз неговиот автомобил биле фрлани камења, нарекувајќи го инцидентот „неприфатлив“.