Танкер погоден од непознат проектил во Ормускиот Теснец, повредени двајца членови на екипажот

Танкер што пловел низ Ормускиот Теснец денес е погоден од непознат проектил, при што двајца членови на екипажот се здобиле со полесни повреди, соопшти Британската организација за поморски трговски операции (УКМТО), јавува Анадолу.

УКМТО соопшти дека добила пријава за пловен објект што транзитирал по стратегискиот воден пат во правец кон внатрешноста.

„Воените власти ја информираа УКМТО дека танкер што транзитирал во правец кон внатрешноста бил погоден од непознат проектил“, се наведува во соопштението.

Двајца членови на екипажот се здобиле со полесни повреди, а танкерот продолжил кон следното пристаниште, се додава во предупредувањето.

Властите го истражуваат инцидентот, соопшти УКМТО.

Засега нема дополнителни информации, вклучително и за тоа чиј е танкерот или за потеклото на проектилот.