„Повлекувањето на израелската војска од Хан Јунис не е поврзано со договор за заложници“

КУДС/ЕРУСАЛИМ (АА) - Одлуката на израелската војска да ги повлече сите свои сили од градот во Јужна Газа, Хан Јунис, не е поврзана со преговорите за договор за заложници, објави израелски медиум цитирајќи високи израелски воени претставници, пренесува Анадолу.

„Како што објасни еден офицер, по операцијата на 98. дивизија на подрачјето на Хан Јунис четири месеци таквите маневри од големи размери даваа сè помали резултати“, пишува израелскиот дневен весник Хаарец.

Воените лидери, кои претпочитаа да не ги откриваат своите имиња, рекоа дека израелската војска „одамна сфати дека држењето голем број војници што, всушност, се статични во Газа наместо нивно преместување да се борат во нови области, ги загрозува бидејќи нивните фиксни позиции ги претворија во цели за терористичките ќелии“, се вели во веста.

Бригадите Ал-Касам, военото крило на палестинската група Хамас, секојдневно објавуваат убивања и ранувања на израелски војници и уништување на воени возила, емитувајќи видеа во кои се документирани некои од нивните операции.

Израелските воени лидери рекоа дека „повлекувањето не е мерка за градење доверба за да им се помогне на преговарачите што отидоа во Каиро на нови разговори во неделата... Одлучено е строго од оперативни причини врз основа на безбедносната ситуација во областа, а не поради американските барања“, се наведува.

Според израелската радиодифузна корпорација, претходно израелска делегација замина во Каиро за да ги продолжи разговорите за договор за размена на затвореници со Хамас.

Израелските медиуми вчера наутро објавија дека израелската војска ја повлекла својата 98. дивизија, со нејзините три бригади од Хан Јунис.

Според армиското радио, во Газа останала само една бригада, бригадата Нахал, која е одговорна за обезбедување на коридорот што го воспостави израелската војска за да ги спречи жителите на Газа да се вратат на север.

Израелската војска најави дека планира инвазија на градот Рафа, каде што од тековните напади се засолнија повеќе од 1,4 милиони луѓе.

Плановите на Израел за офанзива во Рафа го огласија меѓународниот аларм, многумина повикаа на воздржаност или откажување на операцијата.

Израел спроведува смртоносна воена офанзива во Појасот Газа по прекуграничниот напад на почетокот на октомври минатата година од страна на палестинската група Хамас во кој загинаа околу 1.200 луѓе.

Оттогаш се убиени речиси 33.200 Палестинци, а околу 75.900 се повредени во жестоките израелски напади.

Израел, исто така, воведе целосна блокада на Појасот Газа, оставајќи го неговото население, особено жителите на Северна Газа, на раб на глад.

Според Обединетите нации, израелската војна принуди 85 отсто од населението на Газа внатрешно да се раселат, предизвика акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.

Израел е обвинет за геноцид пред Меѓународниот суд на правдата (МСП), кој неодамна побара од него да стори повеќе за да се спречи глад во Газа.