Сирија го осуди признавањето на израелскиот суверенитет над окупираната Голанска Висорамнина од страна на Колумбија

Сирија остро го осуди признавањето од страна на Колумбија на, како што го нарече, „израелскиот суверенитет“ над окупираната сириска Голанска Висорамнина, оценувајќи дека потегот претставува прекршување на меѓународното право и релевантните резолуции на ОН, пренесува Анадолу.

Во соопштение сириското Министерство за надворешни работи ја осуди декларацијата на Колумбија од 10 август со која се признава израелскиот суверенитет над окупираната Голанска Висорамнина, врз основа на, како што наведе, безбедносни аргументи што не се во согласност со меѓународното право.

Министерството потврди дека Голанската Висорамнина е неотуѓив дел од сириската територија и оцени дека ставот на Колумбија ги прекршува Повелбата на ОН, принципот дека територија не може да се стекнува со сила, како и Резолуцијата 497 на Советот за безбедност на ОН од 1981 година.

Во соопштението се наведува и ставот на генералниот секретар на ОН, Антонио Гутереш, дека Голанската Висорамнина е сириска територија и дека Обединетите нации ја признаваат како дел од Сирија.

Министерството оцени дека меѓународната поддршка за ставот на Сирија во врска со окупираната Голанска Висорамнина се зголемува, посочувајќи дека бројот на земји што ја поддржале годишната резолуција на Генералното собрание на ОН насловена „Сирискиот Голан“ се зголемил од 97 во 2024 година на 123 во 2025 година.

Сирија, исто така, ги осуди континуираните израелски напади и упади на сириска територија и ги повика државите и меѓународните организации да го почитуваат меѓународното право и резолуциите на ОН.

Во соопштението се додава дека Сирија ќе продолжи да користи дипломатски и правни средства за заштита на својот суверенитет, територијалниот интегритет и правата, како и за враќање на окупираните територии.