Шефот на германската разузнавачка служба предупреди на ризик од конфликт со Русија

Германија е во опасност да биде вовлечена во конфликт со Русија, предупреди денес шефот на германската служба за надворешно разузнавање, истакнувајќи дека Москва сега ја третира Германија како главен противник, јавува Анадолу.

Мартин Јегер, претседател на Федералната разузнавачка служба (БНД), пред парламентарната комисија за разузнавање изјави дека конфронтацијата со Русија добила нова и поопасна димензија.

„Германија е во опасност да биде вовлечена во насилен конфликт со Русија. Обидот за напад во Лајпциг е само еден пример за тоа“, рече тој, осврнувајќи се на обидот за напад со дрон врз украински товарен авион во август.

„Ниедна друга земја во моментов не претставува толку директна, сеопфатна и конкретна закана за Германија“, рече Јегер. „Ние не ја баравме оваа конфронтација. Русија ни ја наметнува и нè гледа како главен противник бидејќи одбиваме да ги прифатиме нејзините ревизионистички и експанзионистички политики, како и нејзината агресорска војна против Украина.“

Неговите изјави се дадени еден ден откако канцеларот Фридрих Мерц го посети Киев и најави нови мерки за поддршка на Украина. Само неколку часа пред таа посета руското Министерство за надворешни работи ги повика странските дипломати и другите посетители да ја избегнуваат украинската престолнина, а особено воените објекти и владините згради. Нападите со дронови врз Киев продолжија и за време на посетата.

– Руската „војна од сенка“ против Германија –

Јегер им рече на пратениците дека според процените на БНД, Германија станала главна пречка за „проекцијата на руската хегемонистичка моќ во Европа“, а со тоа и примарна цел за руските операции.

Тој ја обвини Москва дека ги засилува сè поагресивните тајни активности на своите служби во и против Германија.

„Русија води војна од сенка против нас“, рече Јегер, мислејќи на обидите за саботажа и другите хибридни напади. „Оваа необјавена војна не може да се дефинира преку конвенционални воени или правни категории. Германија нема прогласено уставна состојба на одбрана, а сепак сме под напад.“

Јегер изјави дека на разузнавачките служби им се потребни нови овластувања и дека владиниот нацрт-закон ќе ја зајакне БНД како прва линија на одбрана на Германија.

„Руските разузнавачки служби дејствуваат со висок степен на професионалност и безмилосност“, рече тој. „Заканата од напади врз цели во Германија останува реална и актуелна. Мора да се спротивставиме на тоа. Исто така, тоа бара суштинска промена во Федералната разузнавачка служба.“

Русија сè уште нема издадено соопштение како одговор на предупредувањата на шефот на БНД. Во минатото Москва ги отфрлаше како неосновани обвинувањата за хибридни напади во Европа, обвинувајќи ги западните влади дека ги користат таквите тврдења за да ги оправдаат повисоките воени трошоци и да ја одржат поддршката за Украина.