Ayhan Şimşek
03 Октомври 2025•Ажурирај: 03 Октомври 2025
БЕРЛИН (АА) - Премиерот на германската покраина Баварија изјави дека на полицијата треба да ѝ се даде овластување да соборува сомнителни беспилотни летала, поради кои аеродромот во Минхен беше привремено затворен, поради што илјадници патници останаа заглавени, пренесува Анадолу.
„Инцидентите со беспилотни летала го покажуваат интензивниот притисок со кој се соочуваме. Отсега натаму, нашата политика мора да биде: соборете ги наместо да чекате. Нашата полиција мора да биде во можност веднаш да соборува беспилотни летала“, изјави денес Маркус Зедер за весникот „Билд“.
Регионалниот конзервативен лидер, кој ја предводи јужната германска покраина Баварија, исто така, повика на пошироки безбедносни мерки, барајќи, како што го нарече, „Железна купола“ за Германија, за заштита на критичната инфраструктура и воените инсталации.
„Итно ни е потребна ефикасна заштита за целата наша инфраструктура и воени објекти“, нагласи Зедер.
„Баварија предлага забрзано законодавство. Ќе го разгледаме ова на состанокот на нашиот Кабинет во вторник. Федералната Влада, исто така, мора брзо да ги адаптира законите за безбедност во воздухопловството“, рече тој.
Коментарите дојдоа откако беа забележани беспилотни летала, при што ги принудија властите да ги запрат операциите на аеродромот во Минхен, еден од најпрометните туристички центри во Германија.
Поради затворањето, кое започна во 22:30 часот по локално време, блокирани беа приближно 3.000 патници кои мораа да ја поминат ноќта на лежалки или на седишта. Службениците објавија дека 17 авиони не можеле да слетаат, а 15 биле пренасочени кон други аеродроми.
И покрај распоредувањето на специјализирани тимови на терен и полициски хеликоптери, баварските власти не беа во можност да идентификуваат кој управувал со беспилотните летала.
Во Северна Германија минатата недела, исто така беа забележани беспилотни летала, кои предизвикаа тревога, но истражителите не успеаја да ги идентификуваат одговорните.
Претходно оваа недела федералната Влада објави планови за формирање национален центар за одбрана од беспилотни летала заради координација меѓу државните и федералните власти во врска со заканите од беспилотни летала.
Министерот за внатрешни работи Александар Добриндт изјави дека Владата наскоро ќе го измени законодавството за да ги зајакне законските овластувања на безбедносните сили за борба против беспилотните летала.
