Белгија истражува апликација поради наводи дека поттикнува нелегални улични трки и брзо возење

Белгиските власти истражуваат меѓународна мобилна апликација поради наводи дека поттикнува нелегални улични трки и прекумерно брзо возење, објавија локалните медиуми денес, пренесува Анадолу.

Федералниот министер за мобилност Жан-Лик Круке започна истрага за „ТрипРанк“, апликација популарна меѓу учесниците во улични трки, објави белгискиот дневен весник „Хет Лаатсте њус“.

Иако условите за користење на апликацијата експлицитно забрануваат несовесно возење и улични трки, нејзиниот систем за бодирање наводно ги наградува корисниците за постигнување поголеми брзини.

Возачите низ светот можат да се натпреваруваат меѓу себе преку виртуелна ранг-листа, при што добиваат повеќе поени со зголемувањето на брзината. Постигнувањето брзина од 250 километри на час се класифицира како „многу добар резултат“, што се прикажува на профилот на корисникот.

Сè уште не е јасно дали Белгија ќе ја забрани апликацијата.

„Свесни сме за постоењето на оваа апликација и дополнително ја разгледуваме ситуацијата со релевантните партнери и вклучените актери, вклучително и правосудниот систем“, изјави Круке за весникот.

„Промовирањето несоодветно или прекумерно брзо возење е апсолутно непожелно и е во спротивност со нашите напори за безбедност на патиштата“, додаде тој.

Белгиската федерална полиција и Институтот за безбедност на патиштата „Виас“, исто така, предупредија за апликацијата, оценувајќи дека таа поттикнува исклучително опасно однесување во сообраќајот.

Според наводите, „ТрипРанк“ е преземена околу 250.000 пати низ светот. Бројот на корисници во Белгија не е познат.