Ayhan Şimşek
19 Февруари 2023•Ажурирај: 20 Февруари 2023
МИНХЕН (АА) – Европската Унија (ЕУ) треба брзо да ја зголеми и забрза својата воена поддршка за Украина, изјави денес шефот за надворешна политика на ЕУ, Жосеп Борел, јавува Анадолу.
„Сите европски лидери овде вчера рекоа дека Русија не може да победи во оваа војна, дека Украина мора да победи“, порача Борел од Минхенската безбедносна конференција.
Повикувајќи ги лидерите да „преминат од зборови на дела“, тој ја истакна потребата да се забрза воената поддршка за Украина поради тоа што земјата е во критична ситуација во однос на снабдувањето со муниција.
Борел истакна дека проблемот треба да се реши во рок од неколку недели, без да се чека завршувањето на новите набавки или заедничките европски програми за набавки.
„Мораме да го искористиме она што го имаме, она што го имаат земјите членки и тие треба брзо да обезбедат дел од својата муниција, додека чекаат да ги наполнат своите резерви“, рече тој.
Борел ги повика земјите членки на ЕУ да ја забрзаат испораката на тешкото оружје, меѓу кое и борбените тенкови.
„Сите знаат дека за да се победи во војна, класична војна, потребни се борбени тенкови. Не можете да победите во оваа војна без вакво оружје“, рече тој.
