Beyza Binnur Dönmez
29 Септември 2023•Ажурирај: 03 Октомври 2023
ЖЕНЕВА (АА) - Европската Унија (ЕУ) работи на развивање механизми за забрзување на процесот на проширување за земјите кандидати, изјави еврокомесарот за соседство и проширување Оливер Вархеји, јавува Анадолу.
Изјавата на Вархеји следуваше по неформалниот состанок на министрите за внатрешни работи во Мурсија, Шпанија.
„За неколку недели ќе видите како презентираме нов начин на размислување за проширувањето и пакет што сега ќе вклучува десет земји кандидати или земји со европска перспектива“, рече Вархеји.
„Во тој извештај ние не само што сакаме да продолжиме напред туку сакаме да обезбедиме и средства за забрзана интеграција“, додаде тој.
Тој истакна дека проширувањето и понатаму е процес заснован врз заслуги, напоменувајќи дека земјите кандидати ќе мора да ги исполнат сите критериуми за да станат членки на ЕУ.
Тој нагласи дека за време на состанокот министрите разговарале за тоа како би можеле да ги поддржат земјите кандидати да го забрзаат спроведувањето на реформите и почнале да бараат начини за забрзување на целиот процес.
„Во моментов ЕУ развива механизми за забрзување на пристапувањето на земјите кандидати до 2030 година“, рече Вархеји, додавајќи дека вистинското прашање е дали земјите кандидати дотогаш ќе бидат подготвени.
Како што објасни тој, нивниот план за поддршка на земјите кандидати се заснова врз четири столба што вклучуваат развој на стимулации за зајакнување на социоекономските реформи, создавање можности за постепена интеграција на овие земји на единствениот пазар, поинтензивни активности насочени кон реформи во областа на владеењето на правото и демократијата и обезбедување на потребните алатки за затворање на економскиот и социјалниот јаз пред самото пристапување во ЕУ.
