Sidrah Gufran Roghay
21 Октомври 2022•Ажурирај: 22 Октомври 2022
ЛОНДОН (АА) - Сер Грахам Брејди, претседател на влијателниот Комитет на конзервативните пратеници од 1922 година, вчера изјави дека на кандидатите кои сакаат да ја заменат Лиз Трас како лидер на Конзервативната партија и премиер, ќе им требаат најмалку 100 номинации од нивните колеги пратеници, јавува Агенција Анадолија (АА).
Ова е многу висока граница, а овој потег е намерно дизајниран да го ограничи бројот на кандидати на тројца и да обезбеди забрзана лидерска кампања.
„Одредивме висок праг, но праг што треба да го постигне секој сериозен кандидат кој има изгледи да го помине“, рече сер Грахам.
Претходно во текот на денот, тој изјави: „Разговарав со претседателот на партијата, Џејк Бери, и тој потврди дека ќе биде можно да се спроведе гласање и да се завршат изборите за лидерство до петок, 28 октомври. Значи, треба да имаме нов лидер пред 31 октомври.
Трас дотогаш ќе остане премиерка.
Последните избори за лидер на партијата траеја шест недели и вклучуваа повеќе кругови на гласање и лидерски дебати.
На последниот круг на гласање, поранешниот канцелар Риши Сунак обезбеди 137 номинации од пратениците, Трас 113 и владината министерка Пени Мордоунт, 105.
Номинациите за актуелните лидерски избори се отворени до понеделник до 14 часот.
Последните двајца кандидати ќе имаат една лидерска дебата организирана со медиумите, пред членовите да гласаат онлајн. Пратениците ќе ги изберат конечните двајца кандидати, но членовите ќе го кажат последниот збор.
Сунак беше префериран кандидат од пратениците, но членовите ја избраа Трас.
Сунак постојано предупредуваше дека неортодоксните економски ставови на Трас ќе ја загрозат британската економија, а локалните медиуми известуваат дека многу конзервативни пратеници бараат кандидат за единство за да не се гласа за членството.
Ниту еден кандидат досега не се пријави, но тројцата главни кандидати за кои се зборуваше во медиумите се Сунак, Мордаунт и претходникот на Трас, поранешниот премиер Борис Џонсон.
Џонсон беше соборен од неговата партија пред само шест недели по низа скандали, вклучувајќи го и прогласувањето за виновен за кршење на сопствените правила за карантин за време на мерките за заштита од Ковид-19.
Без оглед на тоа кој ќе победи, има сè погласни повици за општи избори, не само од опозициските партии.
Сер Кир Стармер, лидер на главната опозициска Лабуристичка партија, рече дека Конзервативната партија „повеќе нема мандат да управува“ и повика на општи избори, додавајќи: „Британија не е нивни личен феуд да управува [со неа] како што сака.“
