Во експлозија во трговски центар во Египет загинаа 3 лица, 17 се повредени

Во експлозија во трговски центар во Каиро, главниот град на Египет, загинаа 3 лица, а 17 се повредени, пренесува Анадолу.

Според информациите објавени во локалните медиуми, пожар избувнал откако експлодирала боца со хелиумски гас во продавница за сувенири и играчки, што се наоѓа на приземјето на Трговскиот центар „Арабела плаза“ во областа Нов Каиро.

Во инцидентот загинале 3 лица, а 17 се повредени.

Во соопштението на египетското Министерство за внатрешни работи се наведува дека експлозијата се случила во Трговскиот центар „Арабела плаза“, а пожарот од помал обем што избувнал по инцидентот бил ставен под контрола од екипите на цивилната заштита.

Се наведува дека поради експлозијата била причинета материјална штета и на излозите на некои околни продавници.

Беше соопштено дека египетското Обвинителство наредило сопственикот на продавницата за сувенири и играчки, каде што се случила експлозијата, да биде приведен и сослушан.

Обвинителството соопшти дека во првичните проверки било утврдено оти експлозијата била предизвикана од боца со гас и дека се ангажирани стручни екипи за да се утврди причината за инцидентот.

Се наведува дека истрагата за случајот продолжува.