Во нападите на Израел во Појасот Газа загинаа 31.184 Палестинци

ГАЗА (АА) - Најмалку 72 Палестинци загинаа, а 129 се ранети во израелските напади врз Појасот Газа во изминатите 24 часа, пренесува Анадолу.

Ашраф ал-Кудра, портпарол на палестинското Министерство за здравство во Газа, даде информации за израелските напади врз Појасот Газа во текот на 158. ден.

Напоменувајќи дека израелските сили во изминатите 24 часа убиле уште 72 Палестинци во Појасот Газа, Ал-Кудра рече дека бројот на убиени достигнал 31.184.

Како што соопшти, уште 129 Палестинци се ранети во израелските напади во последните 24 часа, со што вкупниот број на повредени Палестинци од 7 октомври минатата година се зголемил на 72.889.

Истакнувајќи дека 72 отсто од Палестинците убиени од израелската војска се жени и деца, Ал-Кудра рече дека од глад и жед починале 27 лица.

Тој нагласи дека под урнатините и покрај патиштата има уште загинати, но поради препреките на израелските сили, медицинските екипи и припадниците за цивилна заштита не можат да стигнат до телата.

По тужбата за геноцид поднесена од Јужноафриканската Република на 26 јануари, Меѓународниот суд на правдата пресуди дека Израел мора да се воздржи од какви било дејства поврзани со убивање, напади и уништување на жителите на Појасот Газа и да ги преземе сите мерки за да спречи геноцид.

Но нападите продолжија со ненамалено темпо, а испораката на помош и понатаму е недоволна за справување со хуманитарната катастрофа.