Во Париз започна судењето за убиството на наставник во 2020 година

АНКАРА (АА) - Во Париз денес започна судењето за убиство на наставникот во Франција на 16 октомври 2020 година, јавува Анадолу.

Осум лица се појавија пред судот под обвинение за тероризам поради убиството на Самуел Пати, 47-годишен наставник по историја и географија во париското предградие Конфлан-Сен Онорин, соопшти француската телевизија Франс Блу.

Наставникот беше обезглавен во октомври 2020 година од страна на Абдула Анзоров, 18-годишно момче од чеченско потекло, кој беше убиен од полицијата.

Наставникот бил цел бидејќи на еден од неговите часови покажал контроверзни карикатури на кои е претставен божјиот пратеник Мухамед.

Двајца соучесници на Анзоров, Наим Будауд (22) и Азим Епсирханов (23), беа обвинети за соучесништво во „терористичкиот атентат“, објави Франс Блу.

Шестмина обвинети се товарат за учество во терористичко и злосторничко здружување.

Истрагите покажаа дека Анзоров не бил еден од учениците на Пати, а неговото име е откриено на социјалните мрежи.

Живеел на околу 100 километри од училиштето во кое предавал Пати.

Судењето треба да заврши кон крајот на декември.