Ruslan Rehimov
28 Април 2022•Ажурирај: 29 Април 2022
КИЕВ (АА) - Генералниот секретар на Обединетите нации (ОН), Антонио Гутереш, ги посети градовите Бородјанка, Буча и Ирпин во Украина, каде што контролата е повторно вратена, пренесува Агенција Анадолија (АА).
Гутереш во изјавата по увидот во населбите на Бородјанка уништени од војната, нагласи: „Го замислувам моето семејство во една од тие уништени и изгорени куќи. Замислувам како моите внуци трчаат во паника. Како еден од членовите на моето семејство е загинат. Војната во 21 век е глупост, војната е бруталност. Војната во 21 век е неприфатлива.“
Гутереш при посетата на Буча истакна дека е задоволен што обвинителите на Меѓународниот кривичен суд се тука и вршат истраги за случувањата во градот.
Нагласувајќи дека ја поддржува работата на Меѓународниот кривичен суд, Гутереш упати повик до Русија да соработува со судот.
Осврнувајќи се на воените злосторства, Гутереш додаде: „Да не заборавиме дека најлошото злосторство е самата војна.“
Од друга страна, Гутереш при посетата на градот Ирпин, рече: „Цивилите секогаш плаќаат највисока цена. Во овие згради живееја невини цивили. Тие ја платија највисоката цена за војната за која никогаш не придонесоа. Секаде каде што има војна, цивилите плаќаат највисока цена.“
