Ayhan Şimşek
21 Ноември 2025•Ажурирај: 22 Ноември 2025
БЕРЛИН (АА) - Германија во 2024 година забележа највисок број жртви на семејно насилство досега, со вкупно 265.942 лица кои претрпеле некаков облик на насилство, покажуваат официјалните податоци објавени денес, јавува Анадолу.
Жените сочинуваат 70 % од жртвите, а во текот на годината биле убиени 308 девојчиња и жени во случаи поврзани со семејно насилство.
Дополнително, полицијата регистрирала 53.451 жена жртва на сексуални деликти во 2024 година, што претставува зголемување од 2 % во споредба со претходната година. Речиси половина од нив биле малолетни во моментот на извршување на делото.
Министерката за семејни работи Карин Приен на прес-конференција во Берлин изјави дека бројките се загрижувачки и дека Владата работи на нови мерки за подобра заштита на жените. Таа истакна дека насилството врз жените е секојдневен криминал кој бара постојана институционална реакција.
Министерот за внатрешни работи Александар Добринт најави дека заштитата на жените ќе биде врвен приоритет за Владата и безбедносните служби. Во рамките на новиот законски предлог, судовите ќе можат да наложат сторителите на семејно насилство да носат електронски алки на глужд за полесно следење и превенција.
Раководителот на Сојузната криминалистичка служба, Холгер Мунк, укажа дека официјалната статистика ги опфаќа само пријавените случаи.
Според него, семејното насилство, кое најчесто се случува зад затворени врати, често останува непријавено, што дополнително го отежнува обезбедувањето навремена заштита и поддршка на жртвите.
Властите нагласуваат дека охрабрувањето на жртвите да пријават насилство е клучен чекор за подобри превентивни мерки и поефикасни механизми за заштита.
