Германските истражители пронајдоа уште еден дрон и експлозиви во близина на Аеродромот во Лајпциг

Во неодамнешниот обид за напад на Аеродромот во Лајпциг се смета дека биле употребени неколку дронови, откако германските власти пронајдоа уште еден дрон и можен воен експлозив, објавија медиумите денес, пренесува Анадолу.

Според јавните радиодифузери НДР, ВДР и дневниот весник „Зиддојче цајтунг“, истражителите во моментов сметаат дека биле употребени неколку дронови, а не само еден.

Првиот дрон бил пронајден на територијата на аеродромот, додека вториот можеби се судрил со авион на ДХЛ.

Трет дрон, за кој претходно не беше објавено, бил пронајден во раните вечерни часови на 14 август на поле во Кабелскетал, област во округот Зале во источната покраина Саксонија-Анхалт, која директно се граничи со западниот дел на Аеродромот во Лајпциг, според безбедносни извори.

Портпаролката на Сојузното обвинителство одби да коментира кога беше прашана за случајот.

Безбедносни извори соопштија дека форензички техничари од Сојузната криминалистичка полиција (БКА) пристигнале на местото на 14 август, заедно со дополнителни полициски сили.

Следниот ден, истражителите наводно откриле супстанција која, според првичните процени, можеби содржела приближно 50 грама од високоексплозивното воено соединение хексоген.

Наодите ја отворија можноста дека сторителите планирале поголем напад отколку што претходно беше јавно познато.

Поминаа нешто помалку од три недели откако на Аеродромот Лајпциг/Хале беше пронајден дрон што носел експлозив.

Според истражителите, дронот бил наменет за напад врз украински товарен авион „Антонов“, што се користел за транспорт на воена опрема. Нападот, сепак, не успеал бидејќи детонаторот на бомбата очигледно бил неисправен.

Истражителите од БКА сега работат по налог на сојузниот главен обвинител Јенс Ромел за да утврдат како требало да се изврши нападот и кој е одговорен за него.