Гладот одзеде 289 животи во Газа поради израелската блокада, од кои 115 деца

АНКАРА (АА) – Уште осум Палестинци, меѓу кои едно дете, починаа во последните 24 часа од неисхранетост предизвикана од задушувачката израелска блокада на Појасот Газа, изјави денес здравствен претставник, јавува Анадолу.

Мунир ал-Бурш, генерален директор во Министерството за здравство на Газа, преку американската компанија за социјални медиуми X истакна дека новите смртни случаи го зголемиле бројот на жртви од октомври 2023 година на 289, од кои 115 се деца.

Израел уби повеќе од 62.600 Палестинци во Газа од октомври 2023 година. Воената кампања ја опустоши енклавата, која се соочува со глад.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.