Девет лица загинаа во пожар во трговски центар во Пакистан

ИСЛАМАБАД (АА) - Најмалку девет лица загинаа, а неколкумина се повредени во пожар кој избувна денес во трговски центар во јужниот пакистански пристанишен град Карачи, јавува Анадолу.

Пожарот избувна во шесткатна зграда со стотици продавници на улицата Рашид Минхас во Карачи. Трговскиот центар во тоа време не бил отворен, но во него имало одреден број луѓе.

Противпожарната служба на Карачи досега потврди девет жртви, соопшти градоначалникот на Карачи, Муртаза Вахаб Сидики преку платформата Х, додавајќи дека операцијата за пребарување и спасување продолжува.

Одделот за спасување и итна помош соопшти дека над 20 лица се спасени и пренесени во болница.