ЛОНДОН (АА) - Велика Британија денес е сведок на историски настан, прво крунисување на монарх по речиси 70 години. Крунисувањето на кралот Чарлс Трети ќе се случи во Вестминстерска катедрала во Лондон, известува Анадолу.
Чарлс Трети (74) стапи на тронот на 8 септември минатата година, а ќе биде крунисан заедно со кралицата Камила во Вестминстерската катедрала, место на крунисување во Британија од 1066 година.
По поворката од Бакингемската палата до катедралата, Чарлс Трети ќе ја прими круната на Свети Едвард, изработена од 2,2 килограми чисто злато, додека кралицата Камила ќе носи модифицирана верзија на круната на кралицата Марија изработена во 1911 година.
По крунисувањето Чарлс Трети ќе стане 40. монарх кој ја положил традиционалната заклетва.
На церемонијата ќе присуствуваат повеќе од 2.200 гости, вклучувајќи шефови на држави, познати имиња и хуманитарни организации од 203 земји, како и членови на кралското семејство.
Ден по крунисувањето, во дворецот Виндсор ќе се одржи голем концерт.
На концертот ќе настапат голем број уметници како што се светски познатите пејачи Кети Пери, Лионел Ричи и Андреа Ботичели.
Концертот, на кој се очекува да присуствуваат 20.000 луѓе од целата земја и кој ќе се следи во живо во повеќе од 100 земји од светот, ќе биде јавен настан со учество на волонтери од бројни хуманитарни организации.
