Melike Pala
18 Ноември 2025•Ажурирај: 19 Ноември 2025
БРИСЕЛ (АА) - Европскиот совет денес ги одобри новите правила со кои на Европската Унија (ЕУ) ќе ѝ се овозможи полесно и побрзо да го суспендира безвизниот краткорочен престој за граѓани на земји надвор од ЕУ, особено во случаи на прекршување на човековите права, јавува Анадолу.
Реформата има за цел да го зајакне механизмот за суспензија на визите, кој моментално опфаќа 61 држава чијшто државјани можат да влезат во Шенген-зоната без виза до 90 дена во период од 180 дена.
Според соопштението, ажурираниот механизам воведува нови основи за активирање на суспензијата, дозволувајќи ѝ на ЕУ да го укине безвизниот режим доколку состојбата со човековите права во некоја земја се влоши или доколку дојде до сериозно нарушување на односите со Унијата. Претходно, механизмот главно се засноваше на индикатори поврзани со миграцијата.
Со измените, ЕУ ќе може да реагира и против земји чии политики значително отстапуваат од европските визни правила или против оние што спроведуваат програми за „инвеститорско државјанство“ со кои се доделува националност без вистинска врска со земјата – практика што Унијата ја смета за безбедносен ризик.
Регулативата го намалува прагот за активирање на механизмот: зголемување од најмалку 30 % кај одбиени влезови, прекумерни престои, барања за азил или сериозни кривични дела ќе се смета за „значително зголемување“, наместо досегашниот праг од 50 %.
Почетната суспензија ќе трае 12 месеци, наместо сегашните девет. По ова, може да следува продолжување од 24 месеци – повеќе од досегашните 18 – што ќе им даде дополнително време на ЕУ и земјата партнер да ги решат проблемите пред да се разгледа трајно укинување на безвизниот режим.
За разлика од актуелните правила, кои во фаза на продолжена суспензија автоматски ги засегаат сите државјани на засегнатата земја, новиот механизам ќе дозволи целење на одредени групи, вклучително и државни службеници и дипломати.
Ажурираната регулатива ќе стапи во сила по 20 дена од објавувањето во Службениот весник на ЕУ и ќе биде директно применлива во сите земји членки.
