ИЗИУМ (АА) - Претседателот на Украина, Владимир Зеленски, пристигна во градот Изиум во областа Харков, кој беше ослободен од руските сили, јавува Агенција Анадолија (АА).
Пред посетата на Зеленски, украинските сили презедоа интензивни безбедносни мерки во Изиум.
Зеленски, кој дојде во градот, присуствуваше на церемонијата на подигнување на украинското знаме пред зградата на Градскиот совет во Изиум.
По едноминутно молчење за загинатите во војната со Русија, знамето на Украина беше подигнато придружено со националната химна.
Зеленски испрати порака до жителите на Крим, кој Русија незаконски го анектира во 2014 година.
Украинскиот претседател нагласи дека жителите на Крим веќе осум години доживуваат голема трагедија.
„Мојата порака [до жителите на Крим] е дека ќе дојдеме. Не ни е грижа за пропагандата на руската телевизија. Знаеме дека вистината е на наша страна. Ќе дојдеме. Не знам кога. Никој не знае, но ние имаме планови и ќе дојдеме. Затоа што тоа е наша земја и тие се наши луѓе. Затоа ќе дојдеме,“ рече тој.
Зеленски зборуваше и за тоа како се чувствува сега, кога дошол во разурнатиот Изиум.
„Бев тука пред да станам претседател. Многу добро го познавам овој регион. Она што го гледаме овде е шокантно. Истото го видовме и во Буча, една од првите окупирани области. Исто е и тука. Уништени се згради и убиени се луѓе. Што да кажам, тоа е дел од нашата вистинска историја и модерната руска нација денес. Тие го направија тоа. Тоа се само тие“, истакна Зеленски.
