Alperen Aktaş
31 Мај 2025•Ажурирај: 01 Јуни 2025
ИСТАНБУЛ (АА) - Украинскиот претседател Владимир Зеленски истакна дека разговарал со претседателот на Турција, Реџеп Таип Ердоган, за потенцијално организирање на четирилатерален самит на кој ќе учествуваат лидерите на Украина, Русија, Турција и Соединетите Американски Држави (САД), пренесува Анадолу.
Во објава на X, Зеленски синоќа го опиша нивниот разговор како „добар и многу суштински“, за време на кој ѝ се заблагодарил на Турција за нејзиниот „принципиелен став во поддршката на територијалниот интегритет и суверенитет“ на Украина.
Тој истакна дека размената на затвореници постигната за време на мировните преговори во Истанбул е „важна“, но нагласи дека понатамошниот напредок бара прекин на огнот. „Убивањата мора да престанат“, рече тој.
Зеленски додаде дека Украина и Турција ги евалуирале условите под кои Киев би се согласил на втора рунда преговори во Истанбул. „Го делиме ставот дека овој состанок не може и не треба да биде напразен“, рече тој.
Тие, исто така, разговарале и за учеството на Турција на самитот Украина-Југоисточна Европа.
„Благодарен сум за чекорите и идеите што можат да ги донесат потребните резултати“, рече Зеленски.
Вчера, Дирекцијата за комуникации на Турција соопшти дека Ердоган и Зеленски имале телефонски разговор.
Турскиот претседател му рекол на својот украински колега дека одржувањето преговори на лидерско ниво меѓу Украина и Русија по преговорите меѓу делегациите ќе биде од корист за мировниот процес, беше истакнато во соопштението на Дирекцијата.
Ердоган додаде дека Турција ќе продолжи со своите напори за обезбедување праведен и траен мир меѓу Киев и Москва.
Првата рунда преговори, организирана од Турција во мај, доведе до размена на затвореници од голем размер, но без договор за прекин на огнот. Се очекува Русија и Украина повторно да испратат делегации во Истанбул за понатамошни преговори.
