Земјите од ЕУ постигнаа договор за климатските цели за 2040 година пред самитот КОП30

БРИСЕЛ (АА) – Земјите членки на Европската Унија денес постигнаа клучен договор за климатските цели на Унијата, со кој се поставува обврзувачка цел за намалување на емисиите на стакленички гасови за 90 % до 2040 година, само неколку дена пред почетокот на климатскиот самит КОП30 во Белем, Бразил, јавува Анадолу.

Според договорот, ЕУ има за цел да ги намали емисиите на стакленички гасови за 90 % најдоцна до 2040 година, во споредба со нивоата од 1990 година. Привремената цел на блокот за 2030 година останува намалување од 55 %.

Данскиот министер за клима Ларс Аагаард изјави дека компромисот „покажува дека можеме да стоиме обединети, дури и во тешки времиња“, додавајќи дека новите цели ќе ги водат политиките, индустријата и инвестициските одлуки во наредните децении.

„Mожеме да изградиме посилна, поконкурентна и побезбедна ЕУ. Тоа е голема работа“, рече Аагаард.

„Целта е во согласност со науката. Таа е потребна, не само за да се покаже нашето глобално лидерство и клима, туку е тука и за да се дадат насоки на индустријата“, рече тој на заедничката прес-конференција по министерскиот состанок во Брисел.

Договорот ѝ дава на Европската комисија формален мандат пред самитот КОП30, каде што Унијата ќе се залага за посилни глобални обврски во областа на финансирањето на климата, адаптацијата, намалувањето на емисиите и заштитата на природата.

Европскиот комесар за клима, нулта емисија и одржлив раст, Вопке Хукстра, го поздрави исходот како „амбициозен и прагматичен“, нагласувајќи дека договорот создава рамнотежа меѓу климатската акција, конкурентноста и енергетската независност.

„Ова е навистина добар компромис. Се договоривме за правно обврзувачка цел од 90 % до 2040 година, со домашна цел од 85 % и можност за користење до 5 % меѓународни кредити. Ги потврдивме и флексибилностите што ги предложивме“, изјави Хукстра.

Првичниот предлог на Европската комисија предвидуваше 90 % намалување на емисиите со можност за користење до 3 % јаглеродни кредити, како мост меѓу сегашната цел за 55 % до 2030 година и конечната цел – постигнување нулта нето-емисија до 2050 година.

„Исто така, го одложуваме стартот на системот ЕТС2 за една година и усвојуваме мерки за негово постепено воведување“, додаде тој.

Климатската цел сè уште не е конечна и ќе треба да биде одобрена од Европскиот парламент пред да стапи во сила.