И покрај израелските копнени напади, над 800.000 Палестинци сѐ уште се во градот Газа и северните подрачја

АНКАРА (АА) - Палестинскиот централен завод за статистика (PCBS) соопшти дека над 800.000 Палестинци остануваат во опколениот град Газа и северните подрачја и покрај тековните израелски деструктивни копнени операции, пренесува Анадолу.

Палестинскиот Централен завод за статистика (PCBS) во соопштението наведе дека оваа бројка укажува дека „две третини од населението на северните гувернерства сѐ уште живеат во северните подрачја на Појасот Газа“.

Се истакнува дека Палестинците одлучиле да останат во северните делови на енклавата „и покрај варварската бруталност на израелското окупационо бомбардирање, што доведе до масовни убиства на цивилите во нивните домови и огромно уништување на станбените згради и на сите цивилни објекти, вклучително и болници, училишта, места за богослужба, пекарници и други објекти“.

Една третина од населението, односно 400.000 Палестинци во северните делови на Газа се раселени на југ од Газа, се вели во соопштението.

Според соопштението, „бројот на населението кое моментално живее во централните и јужните гувернерства на Појасот Газа, вклучувајќи го Деир ал Балах, Кан Јунис и Рафах, изнесува 1,43 милиони лица“.