Израел ослободи 16 Палестинци приведени во Газа

ГАЗА (АА) - Израелските власти денес ослободија 16 Палестинци, меѓу кои едно момче и една постара жена, кои беа приведени од области низ Појасот Газа во текот на нивната копнена операција што се одвива од 27 октомври, јавува Анадолу.

Според дописникот на Анадолу, Палестинците биле ослободени преку воениот пункт Кисуфим на израелската Армија во источниот дел на градот Деир ал Балах, во централниот дел на Појасот Газа.

Дописникот истакна дека 13 од ослободените Палестинци биле пренесени во болницата „Ал Акса“ во Деир ал Балах поради нивните здравствени состојби.

„Кога ги прегледале лекарите, на нивните тела имало знаци на тортура“, додава дописникот на Анадолу.

Во изминатите месеци, израелската Армија во серии ослободи десетици Палестинци од Газа, од кои повеќето страдаа од тешки здравствени состојби заедно со знаци на тортура на нивните тела.

Неодамна ослободените Палестинци во нивните сведочења потврдија дека биле подложени на тортура, понижување и сурово испрашување за време на нивниот притвор.

Илјадници Палестинци беа приведени од израелската Армија од различни области низ Појасот Газа, но сепак, израелските власти одбиваат да дадат точен број на Палестинци приведени во Газа.

Прекршувајќи ја резолуцијата на Советот за безбедност на ОН со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Газа по нападот на Хамас на 7 октомври.

Оттогаш, според локалните здравствени власти, над 38.700 Палестинци, главно жени и деца, се убиени, а повеќе од 89.000 се повредени.

По повеќе од девет месеци од почетокот на израелскиот напад, големи делови од Газа се во урнатини.

Израел е обвинет за геноцид од страна на Меѓународниот суд на правдата, со чија последна пресуда му се наложи веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред почетокот на копнената офанзива на 6 мај.