Израел се закани дека ќе истера 970 пилоти кои бараат крај на војната во Газа

Командантите на Израелските воздухопловни сили денес се заканија дека ќе истераат речиси 970 лица, пилоти, офицери и војници доколку не ги повлечат своите потписи од писмото со кое се бара прекин на војната во Газа, објавија израелските медиуми, пренесува Анадолу.

Израелскиот дневен весник „Хаарец“ објави дека „околу 970 припадници на воздухопловните сили, некои во активна резервна служба, го потпишале писмото со кое се спротивставуваат на војната, но не повикуваат на одбивање на служба“.

Последниве денови високи претставници на воздухопловните сили остварија лични телефонски повици до резервистите што ја поддржаа пораката, барајќи од нив да ја повлечат својата поддршка, пишува медиумот. Според „Хаарец“, командантите ги информирале резервистите дека ќе се соочат со отпуштање доколку одбијат да послушаат.

По заканата, само 25 потписници ги повлекоа своите имиња, а осуммина побараа нивно додавање во листата со потписи.

Потписниците на писмото, меѓу кои и високи офицери и пилоти на воздухопловните сили, тврдат дека „борбите во Газа им служат на политичките интереси, а не на безбедносните“.

Членовите на израелската опозиција долго време тврдат дека војната против Газа има цел да му овозможи на премиерот Бенјамин Нетанјаху да остане на функцијата и нема никаква врска со безбедноста на Израел.