Израелската Армија врши упади врз градови на Западниот Брег, насилно евакуирајќи палестински семејства

НАБЛУС/ИСТАНБУЛ (АА) - Израелската Армија денес изврши упад во градот Наблус во северниот дел на Западниот Брег и распореди големи воени засилувања во западниот дел од градот, според локални извори, јавува Анадолу.

Очевидци за Анадолу изјавија дека израелските сили ги затвориле влезовите кон кружниот тек Завата и околното подрачје во западен Наблус и насилно евакуирале неколку палестински семејства од домовите како подготовка за нивно уривање со експлозиви, под изговор безбедносни причини.

Синоќа, израелските сили упаднаа во градот Хеброн на јужниот дел на Западен Брег, откако еден израелски војник беше повреден во напад со автомобил во близина на населбата Кирјат Арба.

Очевидци за Анадолу изјавија дека израелските сили влегле во градот од неколку правци и ги затвориле влезовите со воени контролни пунктови.

Во меѓувреме, официјалната новинска агенција ВАФА објави дека израелските сили извршиле рации во близина на неколку болници во Хеброн и се стационирале на нивните влезови.

Израелската Армија денес соопшти дека лицето кое стои зад нападот со автомобил е убиено во Хеброн.

Инцидентот се случува во време на невиден пораст на нападите на израелската Армија и нелегалните доселеници врз Палестинците, нивниот имот и нивните средства за живот низ целиот Западен Брег.

Повеќе од 1.085 Палестинци оттогаш се убиени, а 10.700 се повредени во нападите на Армијата и илегалните израелски доселеници на окупираната територија. Приведени се и над 20.500 лица.

Меѓународниот суд на правдата ја прогласи израелската окупација на палестинската територија за нелегална и повика на евакуација на сите населби на Западниот Брег и Источен Ерусалим.