Италијанскиот претседател предупреди на „драматични последици“ без заедничка европска одбрана

ИСТАНБУЛ (АА) - Италијанскиот претседател Серџо Матарела предупреди на „драматични последици“ доколку Европа не успее да изгради обединета одбранбена структура, објави италијанската новинска агенција АНСА, пренесува Анадолу.

„Неуспехот да се воспостави заедничка европска одбрана денес ги покажува сите драматични последици од неактивноста во процесот на интеграција“, рече Матарела во обраќањето пред учесниците на форумот за дијалог меѓу Италија и Шпанија.

Укажувајќи на континуираните „одложувања“ во воспоставувањето заедничка одбрана, тој ја повика Европската Унија да покаже „визија“ и да дејствува „итно“.

„Во историски момент карактеризиран со сè посложени глобални предизвици и сè поконкурентен геополитички пејзаж, соработката меѓу Италија и Шпанија е клучна за да се овозможи Европа да игра водечка улога на меѓународната сцена“, додаде тој.

Матарела, исто така, повтори дека зајакнувањето на способноста на Европа да расте и да создава можности е „од суштинско значење“, нагласувајќи ја потребата од обезбедување еднаков пристап до економски придобивки.