Израелската Армија изврши нови рации на окупираниот Западен Брег, приведе 16 Палестинци

РАМАЛА (АА) - Најмалку уште 16 Палестинци се приведени денес во новите израелски воени рации на окупираниот Западен Брег, јавува Анадолу.

Рациите се извршени на окупираната територија во градовите Витлеем, Хеброн, Наблус, Тулкарем, Џенин и Рамала, се вели во заедничката изјава на Комисијата за прашања на затворениците и Палестинското здружение на затвореници.

„Рациите беа обележани со злоупотреба, закани кон затворениците и нивните семејства и акти на вандализам и уништување на домовите на граѓаните“, се додава во соопштението.

Со новите приведувања е зголемен бројот на Палестинците кои израелската Армија ги приведе на Западниот Брег од октомври минатата година на над 12.100, вклучувајќи ги и оние кои биле ослободени откако биле приведени, според палестинските податоци.

Бројката не ги вклучува приведените од Појасот Газа чиј број се проценува на илјадници.

Во текот на изминатите неколку години, израелската војска спроведуваше редовни рации на Западниот Брег, кои ескалираа со почетокот на војната во Газа на 7 октомври 2023 година. Палестинците, исто така, беа насилно нападнати од илегалните еврејски доселеници.

Најмалку 812 Палестинци оттогаш се убиени, а над 6.450 се повредени во оган на израелската Армија на окупираната територија, според Министерството за здравство.