Израелската Армија изврши упад во болницата Ал-Шифа во Газа по втор пат за 24 часа

ИСТАНБУЛ (АА) - Израелската Армија синоќа по втор пат за помалку од 24 часа изврши упад во болницата Ал-Шифа во градот Газа, пренесува Анадолу.

Палестинската официјална новинска агенција ВАФА соопшти дека израелските воени булдожери и возила го нападнале болничкиот комплекс од неговиот јужен влез.

Целта на нивниот упад сè уште не е јасна.

Претходно вчера, израелската Армија се повлече од внатрешноста на болницата откако утрото изврши упад, но ја задржа опсадата, спречувајќи какво било движење во комплексот.

Тенковите и воените возила на израелската Армија ја опколија болницата изминатава недела.

Израелските власти постојано велеа дека болницата се користи како воен команден центар на групата Хамас, обвинение кое сè уште не е докажано, а групата Хамас остро го негира.

Основана во 1948 година, болницата Ал-Шифа е најголемата болница во Газа со капацитет од 500 до 700 кревети.

Владината канцеларија за медиуми во Газа соопшти дека израелската Армија досега гаѓала 52 здравствени центри и 55 амбулантни возила, додека 25 болници останале без работа поради бомбардирање или недостаток на гориво и медицински материјали.

Според најновите податоци на палестинските власти, од 7 октомври досега се убиени најмалку 11.500 Палестинци, меѓу кои над 7.800 се жени и деца, а повеќе од 29.200 други се повредени.

Илјадници згради, вклучувајќи болници, џамии и цркви, исто така се оштетени или уништени во немилосрдните воздушни и копнени напади на Израел врз опколената енклава.

Бројот на загинати во Израел изнесува околу 1.200.