Израелската Армија повторно издаде предупредување за „итна“ евакуација за населбите во Газа

ЕРУСАЛИМ/ИСТАНБУЛ (АА) – Израелската Армија денес повторно издаде предупредување за „итна“ евакуација на неколку населби во градот Газа и северните губернии, во рамки на тековната офанзива врз енклавата, јавува Анадолу.

Портпаролот на Армијата, Авичај Адрае, ги повика палестинските жители да ги напуштат областите кои повеќепати беа предмет на евакуациски наредби во јуни.

Во соопштението се наведуваат делови од градот Газа, како Источен Зејтун, Стариот Град, Туркман, Ал-Џадида, Ал-Дараџ, Ал-Сабра и Ал-Туфах.

Во северните губернии, наредбата за евакуација ги опфаќа Џабалија, бегалскиот камп Џабалија и Џабалија ал-Назла, како и населбите Ал-Роуда, Ал-Нахда, Ал-Зухур, Ал-Нур, Ал-Салам и Тал ал-Заатар.

Армијата им нареди на Палестинците во тие области да се преселат во западната област Ал-Маваси.

Израелската Армија им нареди на жителите да се упатат кон западниот дел на Ал-Маваси, кој го класифицира како „хуманитарна безбедна зона“. Сепак, токму таму изврши и смртоносни напади врз шаторите со раселени, при што се убиени и повредени стотици луѓе.

Во Армијата се додава дека војската дејствува „со зголемена сила за уништување на непријателот и непријателските организации“, а борбите се прошируваат кон центарот на градот.

Според извештајот на Канцеларијата за координација на хуманитарни прашања на ОН од минатата недела, израелската Армија од 18 март наваму издала околу 54 наредби за раселување, со што биле зафатени околу 297 квадратни километри – или 81 % од Појасот Газа.

Во извештајот се наведува: „Без безбедно место за прибежиште, многу луѓе се засолнуваат во пренатрупани кампови, импровизирани засолништа, оштетени згради, на улици и отворени простори. Населението е принудено да живее во сè помали простори.“

„Заклучно со 9 јули, 86 % од Појасот Газа е во рамки на израелските милитаризирани зони или под наредби за евакуација од 18 март“, се наведува.

И покрај меѓународните повици за прекин на огнот, израелската Армија уби повеќе од 58.400 Палестинци во смртоносната офанзива во Појасот Газа од октомври 2023 година.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради својата војна против енклавата.