Израелски министер повикува на „изгладнување до смрт“ на Палестинците во Појасот Газа

ЕРУСАЛИМ (АА) - Израелскиот министер за наследство Амихај Елијаху истакна дека палестинските цивили во Појасот Газа треба да бидат изгладнети до смрт, известува Анадолу.

Во разговор за телевизијата Канал 7 во Израел министерот Елијаху рече дека е потребно бомбардирање на складиштата за гориво и храна во Појасот Газа.

Тврдејќи дека треба да продолжи ембаргото за хуманитарна помош за Газа, Елијаху тврдеше дека доколку влезе хуманитарна помош, таа ќе им наштети на израелските заробеници и војници „наместо да го ослаби непријателот“.

Алудирајќи на палестинските цивили, Елијаху изјави:

„Штом ќе им се отежнат условите, тие ќе му се отежнат и на Хамас“ и додаде дека не гледа проблем во бомбардирањето на складиштата за храна и гориво во Појасот Газа.

Во текот на телевизиската емисија министерот Елијаху рече:

„Треба да умрат од глад. Ако има цивили што се плашат за своите животи, тие треба да го спроведат планот за миграција.“

Приближно 2,3 милиони Палестинци се борат со глад во Појасот Газа, каде што Израел го запре влезот на хуманитарна помош на 2 март, а подолг период пекарниците не работат поради недостиг на брашно и гориво.

Агенцијата на Обединетите нации за помош и работа за палестинските бегалци на Блискиот Исток (УНРВА) на 4 мај објави дека во регионот се одвива „невидена хуманитарна катастрофа“ во време кога израелската целосна блокада на Газа трае веќе деветта недела.