Израелските сили пребараа 1.000 објекти во рациите во Тулкарем, уапсија 37 Палестинци

АЛ-КУД/ЕРУСАЛИМ (АА) - Израелските сили претресоа околу 1.000 згради на Палестинци и приведоа најмалку 37 Палестинци за време на 45-часовната рација во градот Тулкарем, во северниот дел на окупираниот Западен Брег, јавува Анадолу.

Израелската војска наведе дека „операцијата“ во Тулкарем, во која учествувале интерната разузнавачка агенција Шин-Бет (Шабак), граничарите и израелските сили во цивил познати како „мустарибин“, траела 45 часа.

„За време на акцијата беа претресени 1.000 објекти, испрашани стотици осомничени, а приведени се над 37 лица“, соопшти војската.

Наведено е дека израелските сили „пронајдоа и уништија повеќе од 400 експлозиви, запленија 27 парчиња оружје и голема количина воена опрема, уништија пет лаборатории за производство на експлозив и четири соби за извидување“.

Израелските сили извршија рација во градот Тулкарем и бегалскиот камп на 17 јануари, а потоа рациите беа проширени и на бегалскиот камп Нур Шамс.

Според палестинското Министерство за здравство, израелските сили од 17 јануари убиле осум Палестинци во градот и бегалскиот камп Тулкарем.

Во нападите на израелските сили и илегалните еврејски доселеници на окупираниот Западен Брег и Источен Ал Кудс (Источен Ерусалим) од 7 октомври минатата година убиени се 369 Палестинци.