Илхам Алиев положи заклетва за новиот мандат како претседател на Азербејџан

ИСТАНБУЛ (АА) - Илхам Алиев денес положи заклетва за нов мандат како претседател на Азербејџан за време на церемонијата во главниот град Баку, пренесува Анадолу.

„Фархад Абдулаев, претседател на Уставниот суд на Азербејџан, го покани Алиев да положи заклетва во Националното собрание откако судот официјално ја потврди неговата победа на предвремените избори минатата недела“, се вели во соопштението на азербејџанското Претседателство.

Во соопштението се наведува дека Алиев ја дал заклетвата ставајќи ја раката на Уставот на земјата, заколнувајќи се дека ќе се придржува до него при извршувањето на своите овластувања, како и дека ќе „ги штити независноста и територијалниот интегритет на државата и достоинствено ќе му служи на народот“.

Потоа Алиев ја стави раката на Куранот, муслиманската света книга, укажувајќи дека тој „ќе остане лојален и ќе ги почитува националните и моралните вредности и традициите што со векови ги создавал народот на Азербејџан“.

Азербејџан е официјално секуларна држава, но нејзиното население е претежно муслиманско.

Алиев, кој е претседател на Азербејџан од 2003 година, повторно беше избран за петти мандат на 7 февруари со над 92 отсто од гласовите.