Илјадници Израелци на антивладини протести во Западен Ерусалим

Илјадници Израелци протестираа денес во Западен Ерусалим против предложените промени во Одборот за избор на судии, разрешувањето на шефот на Шин Бет, Ронен Бар, и намерата на Владата да го разреши државниот обвинител Гали Бахарав-Мијара, пренесува Анадолу.

Весникот „Једиот Ахронот“ објави дека илјадници луѓе маршираат низ улицата Каплан меѓу Врховниот суд и Кнесетот (Парламентот) до плоштадот пред седиштето на Владата.

„Денешниот протест доаѓа по разрешувањето на шефот на Шин Бет, Ронен Бар, прекинот на преговорите за договорот за заложници, вчерашното одобрување на буџетот и планот на Владата да го смени државниот обвинител Гали Бахарав-Мијара“, пишува весникот.

Во бруталната офанзива на израелската војска врз Појасот Газа од октомври 2023 година убиени се речиси 50.200 Палестинци, главно жени и деца, а над 113.700 се повредени.

Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.

На протестот учествуваа и членовите на опозициските партии, меѓу кои и лидерот на Национално единство и поранешен министер за одбрана Бени Ганц, заедно со други видни личности во економскиот и судскиот сектор, наведува весникот.

Израелскиот Канал 12 објави дека демонстрациите избувнале по повод гласањето на Кнесетот за нацрт-законот за измена на составот на Комисијата за избор на судии - потег со кој ќе се елиминира застапеноста на Адвокатската комора и ќе им се дадат повеќе овластувања на лица назначени од Владата.

Предложеното законодавство претставува „централен столб“ на планот за „ремонт“ на судството, кој има цел да го ослаби судството, според медиумот.