Иран очекува „прослава на победата“ во војната со САД и Израел

ИСТАНБУЛ (АА) – Иран очекува да ја „прослави победата“ во тековната војна со САД и Израел, изјави денес министерот за надворешни работи на земјата, негирајќи ги извештаите дека Техеран бара прекин на огнот со Вашингтон, јавува Анадолу.

„Ние сме вклучени во горд отпор и без сомнение ќе продолжиме со нашиот отпор“, рече Абас Арагчи во изјавата што ја пренесе новинската агенција ИСНА.

„Во наредните денови ќе ја прославиме нашата победа во оваа војна“, додаде тој.

Иранскиот министер за надворешни работи демантираше дека Техеран испратил какви било пораки за запирање на тековните борби.

„Не сме испратиле никакви пораки и не сме побарале прекин на огнот“, нагласи тој.

Арагчи истакна дека Ормускиот Теснец, клучна транзитна рута за нафтените танкери, „е отворен и затворен само за непријателите“.

„Оваа војна мора да заврши на начин на кој непријателите повеќе нема да помислат на инвазија на Иран и нападите нема да се повторат“, истакна министерот.

САД и Израел ги продолжуваат заедничките напади врз Иран од 28 февруари, при што досега загинаа околу 1.300 луѓе, вклучувајќи го и тогашниот врховен водач, ајатолахот Али Хамнеи.

Техеран возврати со напади со беспилотни летала и ракети насочени кон Израел, како и кон Јордан, Ирак и земјите од Персискиот Залив каде што се наоѓаат американските воени бази.