Италија ќе биде домаќин на меѓународна конференција за обнова на Украина

ИСТАНБУЛ (АА) - Италија и Украина ќе бидат кодомаќини на „Конференција за обнова на Украина“ (URC2025) на 10 и 11 јули во Рим, на која ќе учествуваат околу 5.000 учесници од целиот свет, соопшти денес италијанското Министерство за надворешни работи, пренесува Анадолу.

Конференцијата, која ќе се одржи во Конгресниот центар „Ла Нувола“, е „најважен меѓународен настан посветен на закрепнувањето, обновата и модернизацијата на Украина“, истакна Министерството.

На настанот ќе учествуваат околу 100 владини делегации, 40 меѓународни организации, вклучително и големите банки за развој, 2.000 компании, локални власти, претставници на граѓанското општество и над 500 акредитирани новинари.

Италијанската премиерка Џорџа Мелони ќе ги пречека шефовите на држави и влади утре наутро. По заедничкото фотографирање со лидерите на делегациите, таа официјално ќе ја отвори пленарната сесија во 10:30 часот по локално време со обраќање.

„Конференцијата ќе се фокусира на четири главни димензии: бизнис, хуманитарна, локална и регионална обнова и реформи во процесот на пристапување на Украина во ЕУ“, се наведува во соопштението.

„Ќе биде вклучена и значајна културна димензија, со фокус на заштитата на наследството во конфликтните зони“, се додава во соопштението.

Италијанскиот министер за надворешни работи Антонио Тајани ќе ја отвори „Конференцијата на донатори на Украина“ во 8:30 часот по локално време, сесија посветена на финансирањето на обновата на Украина.

Тој, исто така, ќе го отвори Форумот за обнова на Украина, на кој ќе се одржат неколку тематски панели.

„Тајани ќе се сретне со големи италијански компании што учествуваат на конференцијата и ќе реализира целосна агенда на билатерални средби со своите колеги“, соопшти Министерството.

Украинскиот претседател Владимир Зеленски денес пристигна во Рим по повод конференцијата.