Lina Altawell
08 Април 2026•Ажурирај: 08 Април 2026
Катар денес соопшти дека Иран е обврзан да му ja надомести штетата настаната како резултат на нападите врз неговата територија, јавува Анадолу.
Министерството за надворешни работи објави соопштение во кое се наведува дека Катар испратил две идентични писма до генералниот секретар на Обединетите нации (ОН), Антонио Гутереш, и до претседателот на Советот за безбедност во април, осудувајќи ги иранските напади како „очигледно прекршување“ на неговиот суверенитет, директна закана за неговата безбедност и територијален интегритет, како и ескалација која ја загрозува регионалната стабилност.
Во писмата се наведува дека Иран сноси меѓународна одговорност за нападите, опишувајќи ги како „незаконски дејствија“ поради кои се бара од Техеран да обезбеди отштета за сите претрпени загуби на Катар, соопшти Министерството.
Катар, исто така, нагласи дека нападите биле насочени кон цивилни локации и го прекршиле меѓународното хуманитарно право, вклучително и Женевските конвенции и принципите кои забрануваат напади врз цивили.
Доха потврди дека го задржува правото на одговор според членот 51 од Повелбата на ОН, нагласувајќи дека ќе ги преземе сите неопходни мерки за да го заштити својот суверенитет, безбедност и своите жители.
Трамп синоќа објави дека се согласил „да ги прекине бомбардирањата и нападите врз Иран во период од две недели“.
Тој ја соопшти својата одлука помалку од два часа пред крајниот рок што му го постави на Иран за повторно отворање на Ормускиот Теснец и прифаќање на договорот, предупредувајќи дека во спротивно, земјата ќе се соочи со она што тој го опиша како уништување на „цела една цивилизација“.
Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.
Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.
